Oppsummering så langt

Prøver å tenkja gjennom kva eg har lært i løpet av kursrekkja. Ein del visste eg frå før, sånn omtrent, men eg har fått utdjupa ein del kunnskap, og funne ein del ny, og dessutan sett ting i samanheng.
Eg har fått vita om fleire gode måtar å presentera kunnskapen på, og har kunna tipsa vidare, også til folk som vanlegvis veit meir enn meg om ting som har med IT og data å gjera. Og er det noko ein bibliotekar likar, så er det å kunna dela nyttig og artig kunnskap.
Nokre nye metodar er tekne i bruk for biblioteket vårt. Eg kjem ikkje til å bruka alt vi har vore borti, i alle fall ikkje akkurat no. Men eg har eit betre grunnlag for å ta avgjerda om bruk eller ikkje bruk. Og det er også godt.
Det eg brukar mest akkurat no, er Facebook, som eg koblar til ulike andre kjelder. Om det vert slik i all framtid, er tvilsamt. Ein kan jo ikkje stivna i ei form, men denne forma kjennes fleksibel nok akkurat no.
Eg har lært både av samlingane, av leksjonane, oppgåvene, og av det eg har lese som dei andre på kurset har gjort.
Vi på vårt bibliotek må også sikra at det er ei felles oppgåve å halda nettkontakt med brukarane.
Det vert og lettare å ta kontakt med andre bibliotek etter kurset er ferdig.
Eg har tenkt å halda fram å utvikla meg på dette området. Det kjem sikkert de andre også til å gjera. Så kanskje vi kunne ta opp dette temaet på regionale bibliotekmøte neste haust? Så kan vi læra av kvarandre vidare. Som så mange andre område, så er IT eit område der ein som trur han er ferdig utlært ikkje utlært, men ferdig.
Så takk til Fylkesbiblioteket som sette i gang dette og inviterte oss med på tiltaket.

Wiki

Eg har lese om wiki, og eg har prøvd å leggja inn artikkel i Wikipedia. Eg la inn eit lite avsnitt om Skrivareiki, som eg henta fram etter eit kurs med Fylkesarkivet om "Digitalt fortalt". Eg vart litt overraska då innlegget dukka opp i tvilsam riksmålsvariant på Wikipedia, eg hadde trass alt skrive det på nynorsk, meint for den utgåva... Eg har kontakta han som oversette innlegget mitt, men på spørsmålet om "oversetjinga", får eg ikkje svar.
Så her kjem eg ikkje til å leggja inn meir utan eg har tid til å gjera det på ein kontrollert måte.
Eg har lagt inn ein bokomtale på smakavweb.

Å arbeide i nettsky? Nyttig, men kanskje ikkje heilt enkelt likevel...

Dette gjekk faktisk ikkje! eg prøvde no å visa dokumentet på bloggen ut frå rettleiinga i kurset, men det virka ikkje. Her må det granskast nærare. Dokumentet er åpna for alle, for lesing og redigering, men eg får det berre ikkje innlemma i bloggen.
test
Å laga lenke er greit. Men ikkje å setja dokumentet inn.
Eg ser at Mona har fått til å byggja inn dokumentet sitt i bloggen. Eg er invitert av henne, og kan lesa, men ikkje skriva i det dokumentet. Og akkurat slik var det meint - du styrer jo sjølv kven som får tilgang i dokumenta dine.
Nyttig er Nettsky uansett.
Privat: Slik startar dokumenta. Fint om du vil arbeide på same dokumentet frå ulike stader, ulike maskiner, og ikkje dreg på minnepinne.
Du kan utvida ved å gje tilgang til enkeltpersonar som du inviterer, og du bestemmer om du vil gje dei lese eller redigeringstilgang.
Alle med lenka er som eit hemmelg telefonnummer. Alle som har fått oppgitt lenka, kan lesa (og redigera om du vil det) i dokumentet. Som med eit hemmeleg telefonnummer, kan det henda at dei du har oppgitt det til, gjev det vidare til andre...
Offentleg på nettet kan du bruka om du vil at alle skal sjå det og bruka innhaldet som dei vil. Du kan framleis bestemma om dei skal kunna redigera innhaldet i dokumentet, eller berre ha lesetilgang.

Eg har no lese litt meir om dette i spørsmålsspaltene på googledocs, og finn at det er mange som brukar Firefox nettlesar som har problem. Problema treng heller ikkje vera "stabile", ein dag kan alt virka, neste dag kan berre delar fungera.

Å arbeida i Nettsky - google docs

Då har vi sett i gang testdokument i google docs. Eg starta eit lite eksperiment, og inviterte Ellen og Else. No har dokumentet fått tittel, Guri og Sidsel er invitert med, det blir sikkert fleire etter kvart! I starten er dette privat, men etter kvart vil vi også prøve å dele det på web.... gje melding i kommentarfeltet eller på gmail om du vil bli invitert!

Eg føl med når mannen min for tida brukar nettsky i jobbsamanheng. Han skal saman med 2 personar på andre stader i landet laga utkast til ein plan. Då er Nettsky ein god måte å samarbeida på.
Eg tenkjer meg å bruka Nettsky når vi over nyttår startar arbeidet med plan for arbeidet i Bridgekrinsen. Vi tek utgangspunkt i eit dokument laga av Krinsen i SørTrøndelag, og legg ulike oppgåver til styremedlemmene i høve til å erstatta dei trønderske opplysningane med lokale forhold. Så vil vi kunna sy saman eit lokalt dokument, med mindre arbeid enn om vi skulle ha starta heilt på skratsch.
Det vil sikkert vera situasjonar då dette vil vera aktuelt i biblioteksamanheng også.

Sosiale media for å skapa blest

Skal ein få merksemd, må ein nytta høvet når ein kan bli nevnt på sider som er mykje lesne.
Dette er sosiale media bra til.
Biblioteket vårt kan kanskje få litt ekstra merksemd i dag. Sogn Avis (2816 som "liker") spør på Facebook om det er nokon som har gode haustoppskrifter å dela, og eg nyttar høvet til å invitera dei inn til naboen (Leikanger Folkebibliotek) og sjå i perma vår der vi samlar inn oppskrifter med frukt som vi har fått inn frå lesarane våre.
Vi tek gjerne mot gode oppskrifter frå folk lenger unna også... ;)
Om vi får inn nok gode oppskrifter uten problem med copyright, skal vi laga eit hefte av dette.

Podcast

Det er ikkje berre omtale av bøker du kan finna som podcast, slik det finnest ein del av på bibliotek rundt om i landet.
Likar du lydbøker? På librivox.org kan du laste ned podcast kapittel for kapittel av lydbøker /podcast gratis. Høyrest det ut til å vera for godt til å vera sant? OK, bøkene er lesne av frivillige, og er frå før 1923, slik at dei er utanom copyright-systemet i USA, og dei bed deg sjekka ditt eige land sine retningslinjer sjølv... men bortsett frå det, er det faktisk muleg. Du kan abbonera via RSS-feed, så kapitla kjem deisande inn til deg, 3 g / veke.
Sjekk f.eks Edgar Allan Poe eller Jules Verne, der finnest mange tilgjengelege.
Podiobooks.com, pickthebrain.com og openculture.com har også gratis lydbøker av ulike typar i serieform, for abonnement som podcast, desse såg ved kjapt oversyn ut til å vera litt nyare.

Kor nyttig det med Podcast er for meg som bibliotekar, veit eg ikkje heilt. Ikkje så veldig akkurat no. Men verda endrar seg så fort, så kanskje dette blir spørsmål vi får? Eller svar vi kan gje før brukarane våre har tenkt på denne kanalen?
F.eks. commoncraft.com har mange fine videosnuttar som gjev forklaring på både det eine og det andre. Desse kan vera nyttige for lærarar som treng tips. Og nettopp der er vel første bruksområdet eg ser, i undervising. Podcast i undervisningen er ein artikkel som tek opp nokre idear i så måte.
For oss andre, blir det vel mest for å få med seg yndlingsradioprogrammet ein gjekk glipp av... inntil det dukkar opp ein ny vri som vi ikkje heilt har tenkt på.
Eller om vi gjekk glipp av ein av kursdagane i rekkje, så legg vel Fylkesbiblioteket dei ut som podcast saman med bloggen Ein smak av 2.0, så vi kan høyra og sjå alt som gjekk føre seg i introduksjonen til nye tema. Ikkje sant?

Kanskje eg sjølv kjem til å laga ein podcast for å prøva? Eg har i alle fall lasta ned Audiacity og merka meg bloggen eplekjex.

samling nr 2

I dag er det ny samling, kjekt å treffa att andre som bryner seg på liknande tema som det eg held på med.

Kursleiar oppsummerer, det er tydeleg at ho har lese det vi har prestert. Kjekt å bli sett!

Kjekt å diskutera fellesoppgåve saman med andre. dette kan vera nyttig, enten vi lagar ein slik blogg eller ikkje, tankane kan vi bruka i ulike samanhengar.

Ikkje fullt så kjekt at det var uråd å lesa det som sto på skjermen framme, eller vanskeleg å høyra kva som vart sagt. Men naboane fekk tak i mykje, så då får ein hjelp, likevel.

Og så er det å jobba vidare der vi er - eg hadde nok håpa på litt meir fellesarbeid. Uansett om eg har "kome lenger" enn dei fleste, så har eg lyst til å gå inn i stoffet på nytt, og få det grundigare belyst ved å høyra frå naboane kva utfordring / spørsmål/ ide som dukkar opp hos dei.

Enkelte kan sjå ut til å vera litt skeptisk, men tonen er veldig bra mellom kursdeltakarane...

NRK skole

Eit nytt tilbod har dukka opp på nettet: Nrk skole.
Ved første augekast såg det bra ut, mange fine kategoriar, og innan litteratur var det ei lang namneliste over personar dei er innom.
Fybbloggen linkar til kompetansemålet bruke bibliotek og digitale informasjonskanaler på en målrettet måte, og det ser også bra ut i oversikten.
Då eg såg etter Science Fiction under litteratur, vart eg likevel skuffa. Det kan vera naturleg å ta med Bing og Bringsverd i ein større presentasjon av Science Fiction, her i Norge. Men å BERRE ha dei med, gjer at eg vart veldig skeptisk til opplegget. Eit par av filmsnuttane om forfattarar keik eg på, men dei var faktisk så kjedelege at eg ikkje såg dei ferdig.
Eg håpar dette var lite representativt, og skal sjå på fleire snuttar, særleg innan barnelitteratur.
Er det andre som har sett på dette, og vore heldigare enn meg?

Bruk av sosiale media i det offentlege

http://www.difi.no/sosiale-medier/veileder-i-sosiale-medier er ein grundig (omstendeleg?) veiledar som handlar om offentlige organ sin bruk av sosiale media.

Les for barn!